الله يرحمك يا أبو بدر والله أنك فقيده مو على البقوم فقط على جميع المسلمين ..
أخترت لكم هذه القصيده للشاعر / فيصل الرياحي الله يرحمه ويسكنه فسيح جناته ،،
العين حساسه ومادراك ما العيـن
تعطي خبر عن ماتكن الضلوعـي
ياخذ خبرها نسبه الصدق تسعين
من واقع الحال وصفاه الطبوعـي
وعين النصافي يوم رفت لثنتيـن
امـا فـرح ولاعلـوم تـروعـي
مقاس الاحساس وصدور البراهين
والتجربه بين الضرر والنفوعـي
حياتنـا هـاذي مياديـن تمريـن
والسبت مايلحق نهار الربوعـي
اسبوعها هالحين ياصقر يوميـن
وعود شهرها مثل راس السبوعي
مكاره تلبس من المكـر وجهيـن
وتنصب مطبات الخطر للوقوعـي
مجنونه والناس فيهـا مجانيـن
الا التقييـن السجـود الركوعـي
وجدي على وقت تقافا من سنيـن
وهذا مثل ماقلت صعب الرجوعي
احن للماضـي حنيـن المحبيـن
علي بعضهم يوم فرقا النجوعـي
ليا لاح براق من سهيـل ويميـن
وبرق شمال ونوهـو بالنزوعـي
ذولا مسانيـد وذولاك منحـيـن
ساقتهم اخبار المطر والرجوعـي
بدو خلت مرحانهـم والمعاطيـن
ماحولها غير السـراب اللموعـي
معـاد فيهـا مبـرك للبعـاريـن
ولاالغراب اللي عليهـا يقوعـي
تفرقوا كل علـي رغبتـه ويـن
يتلون شف مذربـات السموعـي
الوسم طاح وساقوا البوش عجلين
يلعب مغنيهم بـروس الفروعـي
الا ثنيـن بالـغـرام متهـاويـن
هاك النهـار ينزفـون الدموعـي
هذاه وجـدي يازبـون المخليـن
وانا بوقت منه يصعـب طلوعـي
صابر وهمي مندفن في الشراييـن
لا الوقت وقت لي ولا النوع نوعي
ياصقر سامحني بعد رفت العيـن
وتم البحر والقافيـه والقروعـي
ماقول غير الله يحفظ السلاطيـن
اللي علي شعب الجزيره دروعـي
الله يرحمك والله أنك شاعر ورجل جزل ..
*
*
عاشق الغلا